ភាពខុសគ្នារវាង BOTOX និង ហ្វ៊ីល័រស្បែក

Botox និង ហ្វ៊ីល័រស្បែកគឺជាការព្យាបាលកែសម្ផស្ស ដែលបានផ្តល់ជូនតាមរយៈការចាក់ ដែលជាធម្មតាត្រូវបានធ្វើឡើងនៅការិយាល័យរបស់គ្រូពេទ្យ។ ពួកវាទាក់ទងនឹងប្រើឧបករណ៍បញ្ចូលនៅក្នុងរាងកាយតិចតួចបំផុត ដែលមានន័យថាពួកវាមិនពាក់ព័ន្ធនឹងការវះកាត់នោះទេ។ នោះហើយជាកន្លែងដែលភាពស្រដៀងគ្នារបស់ពួកវាត្រូវបានបញ្ចប់។ ជាសង្ខេប ភាពខុសគ្នារវាង Botox និង ហ្វ៊ីល័រគឺ៖
Botox ៖ វាធ្វើឲ្យសាច់ដុំកកដើម្បីបញ្ឈប់ស្នាមផ្នត់ និងជ្រួញ ដែលបង្កឡើងដោយការសម្តែងទឹកមុខ។ ជាធម្មតា បញ្ហាទាំងនេះត្រូវបានរកឃើញនៅលើផ្ទៃមុខផ្នែកខាងលើដូចជាថ្ងាស និងបរិវេណជុំវិញភ្នែកជាដើម។

ហ្វ៊ីល័រស្បែក៖ ពួកវាប្រើអាស៊ីតអ៊ីយ៉ាលួរ៉ូនិច និងសារធាតុស្រដៀងគ្នាដើម្បី “ចាក់បំពេញ” ឬបំពេញសាច់នៅកន្លែងដែលបាត់បង់មាឌ និងភាពរលោង។ នេះរួមមានស្នាមជ្រីវជ្រួញនៅជុំវិញមាត់ បបូរមាត់ស្តើង និងថ្ពាលដែលបានបាត់បង់ភាពពេញលេញ។ ពួកវាក៏អាចត្រូវបានប្រើនៅលើស្នាមជ្រីវជ្រួញនៅលើថ្ងាស សម្លាក និងតំបន់ផ្សេងទៀត ដែលត្រូវការមាឌបន្ថែមសម្រាប់រូបរាងរលោងស្អាត។

រយៈពេល៖ Botox មានប្រសិទ្ធភាពរយៈពេលពី 3 ទៅ 4 ខែ។ ហ្វ៊ីល័រមានប្រសិទ្ធភាពខុសគ្នា ដោយអាស្រ័យលើប្រភេទហ្វ៊ីល័រណាមួយដែលត្រូវបានប្រើ។

ដោយសារ Botox និង ហ្វ៊ីល័រគឺជាសារធាតុខុសគ្នា ដែលត្រូវបានបង្កើតឡើងសម្រាប់ការប្រើប្រាស់ខុសគ្នា ពេលខ្លះ ពួកវាអាចត្រូវរួមបញ្ចូលគ្នានៅក្នុងការព្យាបាលតែមួយ។ ឧទាហរណ៍ គេអាចប្រើ Botox ដើម្បីកែតម្រូវស្នាមខ្សែនៅចន្លោះភ្នែកទាំងពីរ ហើយប្រើហ្វ៊ីល័រដើម្បីកែតម្រូវស្នាមខ្សែពេលញញឹមនៅជុំវិញមាត់។

Botox និង ហ្វ៊ីល័រ៖ ចំណុចគួរចងចាំ
ការព្យាបាលដោយប្រើ Botox និង ហ្វ៊ីល័ររាប់លានករណីត្រូវបានធ្វើឡើងជារៀងរាល់ឆ្នាំ ហើយពួកវាមានកំណត់ត្រាតាមដានល្អពីសុវត្ថិភាព។

ការសិក្សាមួយនៅក្នុងតចវិទ្យា JAMA បានរកឃើញថា ការព្យាបាលដោយប្រើ Botox និង ហ្វ៊ីល័រមានសុវត្ថិភាពខ្លាំងណាស់ ពេលធ្វើឡើងដោយគ្រូពេទ្យសើស្បែកដែលមានបទពិសោធន៍ និងមានវិញ្ញាបនបត្រដោយក្រុមប្រឹក្សាគ្រូពេទ្យ។ ផលរំខានបានកើតឡើងដល់អ្នកទទួលមិនដល់ 1 ភាគរយនោះទេ ហើយភាគច្រើនករណីទាំងនោះមិនធ្ងន់ធ្ងរនោះទេ។

ទោះបីជា Botox និង ហ្វ៊ីល័រប្រើឧបករណ៍បញ្ចូលក្នុងរាងកាយតិចតួចបំផុតក៏ដោយ ក៏ពួកវានៅតែមានហានិភ័យខ្លះដែរ។ បុគ្គលម្នាក់ៗគួរតែដឹងពីគ្រប់ហានិភ័យដែលអាចកើតមានឡើង និងអត្ថប្រយោជន៍ មុនពេលទទួលយកការព្យាបាលទាំងនេះ។

Botox និង ហ្វ៊ីល័រមិនត្រូវបានណែនាំឲ្យប្រើលើស្ត្រី ដែលកំពុងមានផ្ទៃពោះ ឬកំពុងបំបៅដោះកូននោះទេ។ អ្នកដែលមានជំងឺជាក់លាក់ណាមួយ ឬដែលប្រើថ្នាំណាមួយ គួរពិភាក្សាថាតើ Botox ឬ ហ្វ៊ីល័រមានសុវត្ថិភាពសម្រាប់ពួកគេឬយ៉ាងណា។

អ្នកទាំងឡាយក៏គួរតែពិភាក្សាពីអ្វីខ្លះដែល Botox និង ហ្វ៊ីល័រអាចធ្វើបានឲ្យប្រាកដសម្រាប់រូបរាងរបស់ពួកគេ។ ទោះបីជាពួកគេអាចបង្កើនភាពវ័យក្មេងឡើងដល់រូបរាងក៏ដោយ ជាទូទៅ ប្រសិទ្ធភាពមិនខ្លាំងក្លាដូចជាការព្យាបាលដោយការវះកាត់ ដូចជាការវះកាត់កែមុខមាត់ជាដើមនោះទេ។

ការប្រើអ្នកផ្តល់សេវាវេជ្ជសាស្ត្រដែលមានលក្ខណៈសម្បត្តិគ្រប់គ្រាន់ដូចជាគ្រូពេទ្យសើស្បែកដែលមានវិញ្ញាបនបត្រពីក្រុមប្រឹក្សាគ្រូពេទ្យ ឬគ្រូពេទ្យវះកាត់កែសម្ផស្ស ជួយធានាបានថា ការព្យាបាលនេះត្រូវបានធ្វើឡើងដោយសុវត្ថិភាព និងត្រឹមត្រូវ។ អ្នកទាំងឡាយគួរពិភាក្សាពីបទពិសោធន៍ និងការបណ្តុះបណ្តាលរបស់អ្នកផ្តល់សេវានេះនៅក្នុងផ្នែកហ្វ៊ីល័រស្បែក និង Botox មុនពេលធ្វើការសម្រេចចិត្ត។

ប្រភព៖ Medical News Today