វិទ្យាសាស្ត្រនៅពីក្រោយហ្វ៊ីល័រស្បែក DERMAL FILLERS

សមាសភាគរចនាសម្ព័ន្ធសំខាន់ទាំងបួននៃមុខរបស់យើងគឺស្បែក ខ្លាញ់ សាច់ដុំ និងឆ្អឹង។ ពេលយើងចាស់ទៅ ការបាត់បង់មាឌក្នុងរចនាសម្ព័ន្ធទាំងនេះរួមចំណែកដល់សញ្ញាដែលបង្ហាញឲ្យឃើញពីភាពចាស់ជរាជាច្រើន។ ហ្វ៊ីល័រស្បែកអាចជួយដោះស្រាយបញ្ហានេះបាន។
បន្តិចម្តងៗ ការបាត់បង់មាឌឆ្អឹងដែលទាក់ទងនឹងវ័យនៅលើមុខអាចនាំឲ្យថ្គាមរួមចូលទៅក្នុង ច្រមុះស្រុត និងបាត់បង់ឆ្អឹងថ្ពាល់ខ្ពស់។ សាច់ដុំផ្ទៃមុខក៏ថយចុះមាឌ និងភាពយឺតផងដែរ ហើយការថយចុះ និងការរំកិលនៃខ្លាញ់ផ្ទៃមុខធ្វើឲ្យសញ្ញាបង្ហាញពីភាពចាស់ជរាកាន់តែច្បាស់បន្ថែមទៀត។ ទីបំផុត ស្បែកនឹងយារធ្លាក់ និងបាត់បង់ភាពយឺត។ ដោយបន្ថែមពីលើដោយការបាត់បង់ការជួយទប់លំនឹងដោយខ្លាញ់ សាច់ដុំ និងឆ្អឹង វានឹងនាំឲ្យមានភាពជ្រីវជ្រួញ ស្បែកយារធ្លាក់ និងសញ្ញាបង្ហាញពីភាពចាស់ជរាស្រដៀងគ្នាផ្សេងទៀត។

ហ្វ៊ីល័រស្បែក ដែលជាការព្យាបាលតាមការចាក់បញ្ចូល ដែលត្រូវបានធ្វើឡើងនៅក្នុងការិយាល័យរបស់គ្រូពេទ្យណាមួយ អាចជួយពង្រាបស្នាមជ្រីវជ្រួញ និងបំពេញបន្ថែមឡើងវិញនូវមាឌដែលបានបាត់បង់ ដែលធ្វើឲ្យរូបរាងក្មេងជាងមុន។

តើអ្វីជាហ្វ៊ីល័រស្បែក?
ហ្វ៊ីល័រស្បែកគឺជាសារធាតុទន់ដូចជែល ដែលត្រូវបានចាក់បញ្ចូលនៅក្រោមស្បែក។ ពួកវាអាចដោះស្រាយបញ្ហាទូទៅបានមួយចំនួន ដែលរួមមានជួយបំបាត់រង្វង់ជ្រៅក្រោមភ្នែក លើកឆ្អឹងថ្ពាល់ ពង្រីកមាឌបបូរមាត់ បំបាត់ស្នាមជ្រួញបបូរមាត់ និងផ្នត់ចម្រុះ (ស្នាមផ្នត់ដែលរត់ពីចំហៀងនៃចម្រុះទៅកាន់ជ្រុងបបូរមាត់) និងធ្វើឲ្យដៃក្មេងជាងវ័យ។

ហ្វ៊ីល័រស្បែកអាចផ្សំពីសារធាតុផ្សេងៗ ដោយសារធាតុខ្លះកើតឡើងតាមធម្មជាតិ និងខ្លះទៀតតាមរយៈការសំយោគ។ ធាតុផ្សំរួមមួយជាងគេដែលត្រូវបានប្រើនៅក្នុងហ្វ៊ីល័រស្បែកគឺអាស៊ីតអ៊ីយ៉ាលួរ៉ូនិច (HA) ។ HA គឺជាសារធាតុកើតឡើងតាមធម្មជាតិមួយ ដែលបានរកឃើញនៅក្នុងស្បែករបស់យើង ហើយវាដើរតួនាទីសំខាន់នៅក្នុងការថែរក្សាសំណើមស្បែក និងពង្រីកមាឌស្បែក។ ហ្វ៊ីល័រ HA ដែលអាស្រ័យលើការរួមផ្សំសារធាតុគីមីរបស់ពួកវា អាចមានអាយុកាល 6 ខែ ឬយូរជាងនេះឆ្ងាយ មុនពេលត្រូវបានស្រូបយកបន្តិចម្តងៗដោយរាងកាយ។

អត្ថប្រយោជន៍ចម្បងមួយរបស់ហ្វ៊ីល័រ HA ក្រៅពីរូបរាងតាមធម្មជាតិរបស់ពួកវា ពេលចាក់បញ្ចូល គឺថាពួកវាអាចត្រូវបានរំលាយ ដោយសូលុយស្យុងពិសេសមួយ នៅក្នុងករណីមានហេតុការណ៍អាក្រក់កើតឡើង ឬប្រសិនបើបុគ្គលដែលប្រើមិនចូលចិត្តរូបរាងនេះ។ ជាងនេះទៀត ហ្វ៊ីល័រ HA ភាគច្រើនត្រូវបានលាយទុកជាមុនស្រេចជាមួយសារធាតុលីដូការអ៊ីន ដែលជាសារធាតុធ្វើឲ្យស្ពឹក ដើម្បីបង្កើនភាពសុខស្រួលឲ្យបានអតិបរមា នៅអំឡុងពេលព្យាបាល។

ជៀសវាងហ្វ៊ីល័រស្បែកក្នុងទីផ្សារងងឹត
ការព្យាបាលដោយប្រើហ្វ៊ីល័រស្បែកអាចមានតម្លៃថ្លៃ ដែលបានញ៉ាំងឲ្យអ្នកប្រើប្រាស់ខ្លះងាកទៅកាន់ទីផ្សារងងឹតតាមអនឡាញ ដើម្បីទិញហ្វ៊ីល័រចាក់ខ្លួនឯង។ នៅក្នុងខែមុន ធ្លាប់មានការរាយការណ៍ជាច្រើននៅក្នុងប្រព័ន្ធសារព័ត៌មាន និងក្នុងឯកសារវេជ្ជសាស្ត្រស្តីពីផលវិបាកដ៏គ្រោះថ្នាក់ដែលកើតចេញពីការចាក់ហ្វ៊ីល័រខ្លួនឯង ដោយអ្នកគ្មានជំនាញខាងសុខាភិបាល។

ហានិភ័យមួយគឺថា ហ្វ៊ីល័រដែលបានទិញតាមអនឡាញ អាចមានផ្ទុកសារធាតុមិនស្អាតផ្សេងៗ ដូចជាជែលលាបសក់ជាដើម។ ពេលចាក់ចូល សារធាតុទាំងនេះអាចបង្កឲ្យមានប្រតិកម្មអាឡែហ្ស៊ី ការឆ្លងមេរោគ និងធ្វើឲ្យស្លាប់កោសិកាស្បែកបាន។ ហានិភ័យមួយទៀតគឺថា បច្ចេកទេសចាក់បញ្ចូលមិនត្រឹមត្រូវមិនគ្រាន់តែអាចនាំឲ្យមានការហើម និងកកដុំៗប៉ុណ្ណោះទេ ប៉ុន្តែថែមទាំងមានផលរំខានធ្ងន់ធ្ងរកាន់តែខ្លាំងដូចជា ធ្វើឲ្យស្លាប់កោសិកាស្បែក និងការស្ទះសរសៃឈាមដែលបណ្តាលឲ្យខ្វះភ្នែកជាដើម។ FDA បានចេញការព្រមានផ្លូវការមួយ ដោយជម្រុញឲ្យអ្នកប្រើប្រាស់ “មិនត្រូវទិញហ្វ៊ីល័រស្បែកតាមអនឡាញនោះទេ។ ពួកវាអាចក្លែងក្លាយ មានមេរោគ ឬបង្កគ្រោះថ្នាក់។”

អ្នកនិពន្ធ៖ Kristina Liu, MD, MHS
ប្រភព៖ ប្លុកសុខភាព Havard (Havard Health Blog)